ISRAEL-Gipasiugda ni Elvie Pregua, Bombo International Correspondent sa Tel Aviv, Israel, nga wala siyay plano nga muoli sa Pilipinas bisan pa sa nagpadayon nga tensyon tali sa Israel ug Iran.
Matod ni Pregua, siyam na siya ka tuig sa Israel ug anad na siya sa mga pagbuto nga murag buto lang sa mga pabuto atol sa Bag-ong Tuig. Bisan pa sa hulga sa mga drone strikes, gibutyag ni Pregua nga mas gipili niyang magpabilin kay sa magutom sa Pilipinas.
Sa pag-atake sa Iran niadtong Biyernes sa gabii, anaa kini sa ilang silingan kauban ang iyang alaga nga bata ug gina-bidyuhan pa gani ang nahitabo.
Dugang pa niini, normal na lang kini para sa ilaha tungod halos matag tuig adunay samang hitabo. Apan ang kalahi-an karon, drone na ang gigamit sa Iran imbes nga rockets, nga mas kusog ug mabati nila ang pag-uyog sa mga building bisan og na-intercept kini sa Iron Dome.
Aniya, kumpiyansa sila sa kanilang kaligtasan dahil mayroon namang bomb shelter.
Gibutyag ni Pregua nga padayon usab ang Philippine Embassy sa Israel sa hugot nga pagbantay alang sa kaayohan og seguridad sa tanang mga Pilipino sa Israel.
Sugod Hunyo 13–14, 2025, naglusad ang Israel og dakong airstrike sa Iran kung asa mitubag usab ang Iran pinaagi sa ballistic missiles og drones.
