GENSAN – Padayon ang paglambo sa kondisyon sa OFW sa Riyadh Saudi Arabia nga na-comatose human giatake sa highblood ug nahagbong sa hagdanan.
Kini ang gibutyag sa Bombo Radyo kang Vangie Pablo, higala ni Veronica Benarao, nga malihok na matud pa niini ang iyang mga kamot, luyo nga dili pa maka-istorya.
Ug gani, pinaagi sa pagtaas sa iyang kamot, gikumpirma matud pa ni Benarao nga walay foul play inay hypertension ang rason sa iyang pagkahagbong.
Una niini, kahinumduman nga gitudlong responsable sa pagkahagbong ni Benarao ang kaubang Pinay DH nga si Elvira nga kanhi na matud pang nakabangi sa nahisgutan.
Apan giklaro matud pa ni Benarao nga wala kadtoy kamatuuran, gumikan aduna lamang matud pay nahitabong misunderstanding, ug wala usay nawala sa iyang bagahe, sukwahi sa nanggawas nga taho nga nangawala ang mga gamit niini samtang atua siya sa ospital.
Gikabutyag nga napugos lamang si Elvira nga ablehan ang iyang maleta aron makuha ang mga dokumento nga gipangita sa embahada.
