GENSAN – Gi-flash alarm na sa mga presinto sa dakbayan og kasikbit nga lugar ang usa ka motorsiklo human nga gikuha sa wala mailhing suspetsado.
Kahinumduman nga midangop sa San Isidro Police station ang biktima nga si Ronald Gino Lerios, 33 anyos, minyo, usa ka OFW nga taga Sapu Padidu Malapatan Sarangani og gireport ang panghitabo.
Gibutyag sa biktima nga alas 12:21 sa udto giparada niya ang iyang raider 115 kulay green sa parking area sa GenSan Doctors Hospital national Highway Brgy City Heights apan ala una sa hapon, nadiskubre nga nawala ang motorsiklo dihang muoli na unta.
Basi sa kopya sa CCTV sa maong ospital, anaa sa 5’5 – 5’6 ang height ang responsable sa pagkuha sa motorsiklo, payaton, nagsul-ob ug tshirt kulay yellow, nagkalo ug nag-jacket ug kulay green, naka-maong pants og nakasapatos.
Paspas nga gisakyan sa suspek ang motorsiklo og gipadagan palayo sa lugar human nga iyang napa-andar.
Nasuta nga usa ka bulan pa lamang gikan nakuha sa casa ang maong motorsiklo.
