GENERAL SANTOS CITY -Subling gibalik sa pagpatuman ang Unified Vehicular Reduction System kon “Odd-Even-Scheme” sa mga pribadong sakyanan pinasubay sa Executive Order 42 ni Mayor Ronnel Rivera tumong nga malimitahan ang operasyon sa mga sakyanan alang sa mga essential travels aron makontrola ang pagkatag pa sa covid-19 sa syudad.
Ang plaka nga nagtapos sa odd numbers kun bungkig nga mga numero sama sa 1,3,5,7, og 9 ang tugtan lamang nga makabiyahe sa adlaw nga Lunes, Miyerkules og Biyernes samtang sa sakyanan nga ang plaka nagtapos sa even numbers kon may pares nga mga numero sama sa 2,4,6,8 og 0 ang pwede lamang makabiyahe og Martes, Huwebes og Sabado, samtang ang adlaw nga Dominggo ang lockdown.
Sakop sa “Odd-Even-Scheme ang tanang private four wheeled vehicles sama sa kotse, pick-up, UV, SUV, motorsiklo, traysikel og uban pang three wheeled vehicles.
Lakip usab ang truck, bus, og uban pang Public Utility Vehicles o unsa mang sakyanan nga gigamit ang service. Samtang, adunay mga sakyanan nga exempted sa Odd-Even-Scheme apil ang mga kondisyon ubos sa EO 42 sa mayor.
Samtang, dungan sa gipatumang lockdown, suspendido ang special permit sa pampublikong transportasyon gikan sa ubang bahin sa rehiyon og interzonal public transport gikan sa ubang rehiyon.
Sa bahin sa Gensan, gitugutan ang pampublikong transportasyon apan ang kadto lamang PUV nga otorisado sa LTFRB sa 14 ka ruta ang tugtan nga makabiyahe sa mga clusters.
Samtang ang mga traysikel tugtan lamang magsakay og pasahero sulod lamang sa clusters kung asa sila pwede makabiyahe.
