GENERAL SANTOS CITY – Hugot na ang pagpangandam sa Office of Civil Defense 12 alang sa gikatakdang pagpahigayon ug 1st Quarter Nationwide Simultaneous Earthquake Drill.
Matigayon kini sa umaabot nga Pebrero 15, adlaw’ng Huwebes, alas-2:00 sa hapon.
Giawhag sa OCD-12 ang tanan, hilabi na ang mga residente ug empleyado sa tibuok rehiyon, nga makiglambigit ug muapil sa nahisgutang earthquake drill, nga mahinungdanon matud pa aron masayran ug masaulo sa katawhan ang mga kinahanglan ug angayang himuon, kon may mahitabo nga linog.
Kini pinaagi sa ilang banner nga Bida ang Handa.
Sa pakighinabi sa Bombo Radyo kang Jorin Mae Balmediano, tigpamaba sa OCD-12, ang pilot area ning tuiga mao ang Cotabato City.
Apan giawhag niini ang mga opisyal sa matag lokal nga panggamhanan sa kasikbit-lugar nga manguna sa pagpartisipar ug pag-apil usab sa naasoy’ng aktibidad.
