Giawhag sa Office of the Civil Defense (OCD) Region 12 ang tanan nga pamilya sa rehiyon nga mag-andam og kaugalingong evacuation plan aron maprotektahan ang ilang kaugalingon sa dihang adunay kalit nga katalagman sama sa linog, pagbaha, o pagdahili sa yuta.
Matud ni Jormae Balmediano, spokesperson sa OCD-12, importante nga andam na daan ang mga pamilya sa bisan unsang oras tungod kay dili masayran kanus-a mahitabo ang kalamidad.
Gipasabot usab sa opisyal nga ginaawhag ang mga ginikanan nga tudluan ang ilang mga anak unsaon pagresponde ug asa modangop kon adunay kalit nga linog o landslide.
Dugang pa ni Balmediano, padayon ang mga pagbansay ug information drive sa mga barangay aron mapaabot sa publiko ang kahinungdanon sa kahandaan ug kaluwasan.
Ang OCD-12 nagpasalig nga magpadayon sa pagtabang ug pakig-alayon sa mga lokal nga pamunuan aron mapalig-on ang disaster preparedness ug kaluwasan sa tibuok rehiyon.
