GENSAN- Nagpadayon ang panawagan sa Office of Civil Defense (OCD) Region 12 ngadto sa mga residente sa General Santos ug Sarangani Province nga magpabiling kalmado apan kanunayng alerto ug vigilante sa ilang palibot human sa nasinating kusog nga Magnitude 7.8 nga lindol.
Matod ni OCD 12 Spokesperson Beverly Anne Santos, hinungdanon kaayo ang pagkamabinantayon sa publiko ilabi na nga nagpadayon pa gihapon ang mga serye sa aftershocks sa rehiyon.
Gipahinumdoman usab ni Santos ang katawhan nga mosunod lamang sa mga opisyal nga advisory ug kamatuoran gikan sa Phivolcs ug Mines and Geosciences Bureau (MGB), ug likayan ang pagpakatapr og mga sayop nga impormasyon sa social media nga wala’y saktong gigikanan o source aron dili makamugna og dili kinahanglang kahadlok ug panic.
Alang sa mga residente nga nagpuyo sa mga daplin sa baybayon o coastal areas, hugot nga gihangyo sa OCD nga mosunod dayon kung adunay kamanduan gikan sa mga otoridad nga mag-evacuate ug mobalhin sa mas luwas nga lugar o higher grounds.
Sa pagkakaron, ang OCD 12 ug ang Regional Disaster Risk Reduction and Management Council (RDRRMC) nagpabilin ubos sa Full Red Alert Status, diin ang tanang resources ug kapasidad sa kagamhanan ug nagkadiyang ahensya sama sa DSWD, DILG, DepEd, DOST, Phivolcs, ug DICT, dungan nga naglihok ug andam mohatag og dinaliang tabang sa mga apektadong komunidad.
