Human sa malampusong Second Quarter Nationwide Simultaneous Earthquake Dril subling nagpahimangno ang Office of Civil Defense 12 sa publiko nga seryosohon ug bantayan pag-ayo ang mga lakang nga ginabuhat atol sa mga earthquake drill aron andam na sa posibleng linog nga muabot.
Matud ni OCD 12 Spokesperson Beverly Anne Santos, importante nga kanunay nga mag-obserba ug magpraktis sa hustong pamaagi panahon sa earthquake drill aron kung adunay tinuod nga pagtay-og nga mahitabo, kabalo na ang matag usa sa angay nilang buhaton aron malikayan ang kadaot ug kapeligrohan.
Gidugang ni Santos nga gikinahanglan usab nga magsalig lamang ang publiko sa mga kasaligan ug opisyal nga tinubdan sa impormasyon ug likayan ang pagtuo o pagpakaylap sa mga balita nga walay kasiguruhan sa social media ug uban pang plataporma.
Sumala kaniya, ang mga dili tinuod nga impormasyon mahimong makamugna og kalibog ug dugang kahadlok sa katawhan ilabina sa panahon sa kalamidad ug emerhensiya.
Samtang, nagpadayon ang OCD Region 12 sa ilang assessment ug monitoring kalabot sa mga epekto sa kusog nga linog nga miigo sa Rehiyon Dose aron masuta ang kahimtang sa mga komunidad ug masiguro ang hustong paghatag sa kinahanglanong tabang sa mga naapektuhan.
