GENSAN- Gipasabot ni Aldrin Regalado gikan sa Office of the Building Official (OBO) sa Gensan ang kahulugan sa gipatuman nga “color coding” alang sa mga building human sa nahitabong linog.
Sumala kaniya, ang “green tag” nagpasabot nga luwas ug pwede nang sudlan ang usa ka gambalay bisan unsang orasa, samtang ang “yellow tag” nagpasabot nga restricted kini o adunay mga delikadong bahin nga dili pwede duolan.
Hugot usab nga “off-limits” ang mga dapit nga narekord nga adunay “red tag” tungod sa delikadong mga liki sa poste ug semento. Sa pikas bahin, opisyal nga napaubos sa “red tag” ang usa ka pribadong tunghaan sa Barangay Lagao human kini makasinati og pagkahugno gumikan sa kakusog sa linog.
Sa pagkakaron, mag-agad na sa ilahang structural engineer ang sunod nga lakang kon ipadayon ba ang pagguba o pag-demolish sa maong estraktura.
Samtang wala pa hinuon makahatag og eksaktong porsiyento ang OBO kon pila na ka mga building ang kinatibuk-ang na-inspeksyon sa tibuok siyudad tungod sa kadaghan sa mga establisimento nga kinahanglan pa nilang susihon.
