GENERAL SANTOS CITY – Gimanduan karon sa Department of Interior and Local Government(DILG) ang mga syudad, munisipyo ug probinsya nga mupasar ug resolusyon alang sa pagdeklara isip persona-non grata kon dili na welcome sa Rehiyon 12 ang New Peoples Army(NPA).
Matud ni DILG 12 Regional Director Jo Leysa, giaprubahan sa Regional Development Council (RDC) 12 ang kalabutan sa maong resolusyon.
Kini ang gilantaw nga pamaagi aron awhagon ang mga nagpabiling sakop sa NPA nga mubalik sa sabakan sa gobyerno.
Kahibaluan nga nagpadayon sa pagpangita ug pamaagi ang gobyerno aron maaghat ang mga rebelde nga mutahan sa ilang kaugalingon.
Ilawom sa Enhanced Comprehensive Local Integration Program (E-CLIP) naghulat ang pinansyal nga ayuda, livelihood assistance, may gihatag usab ang gobyerno nga pabalay ug uban pang benepisyo ngadto sa mga NPA surrenderees.
Sa pakighinabi pa sa Bombo Raduo GenSan, gibutyag ni Lt. Jerry Maburang, civil-military operations officer sa 73rd Infantry Battalion Philippine Army, andam nga mudawat ang gobyerno sa mga rebelde nga musurender ug tabangan sila aron makasugod ug bag-ong kinabuhi.
Kahibaluan nga usa sa mga ginapanawagan sa 73rd Infantry Battalion Philippine Army mao si Kumander Yoyong sa Guerrilla Front 71 nga naglihukan sa Malita, Davao Occidental ug Sarangani.
