GENERAL SANTOS CITY – Gisikop sa kapulisan ang number 4 most wanted sa munisipyo sa Malungon, Sarangani Province gumikan sa pag-atubang ug kaso nga pagpatay ug paghupot ug daghang armas.
Matud ni Police Sr. Instr. Richard Pabalinas, hepe sa Malungon Municipal Police Station nga buntag sayo pa lamang ila nang gisulod ang panimalay sa nagpangalan ug Sammy Maliit, 46 anyos nga taga San Roque, Malungon.
Giangkon ni Pabalinas nga naglisod sila sa pagpatuman sa search warrant tungod sa kalayo sa lugar.
Matud sa opisyal nga sari-sari nga mga home-made nga armas ug mga bala ang ilang nakuha sa kustudiya ni Maliit.
Apan makunsidera matud pang mga high caliber ang nahisgutang armas tungod gigamitan ug mga bala sa M16 rifle ug shotgun.
Gisaysay usab ni Pabalinas nga mismong ang silingan sa suspek ang mitaho kalabutan sa kanunay nga pagsukbit ug armas sa nahisgutan.
Gilayon nga gipailawom sa ballistic ang mga armas sa suspek aron masusi kung gigamit ba kini sa krimen.
