GENERAL SANTOS CITY – Nakabsan na sa kinabuhi sa ospital ang top 1 most wanted sa target list sa Regional Drug Enforcement Unit 12, human mapusilan sa natigayong anti-drug operation kagahapong adlawa.
Natigayon ang insidente pasado alas-4:00 sa hapon, sa Champaca St kanto Naranjita St ning dakbayan, kung asa ang napusilan giilang si Bryan Cortado, Blk 3 Lt 1 Gensanville Subd. Bula ning siyudad.
Base sa impormasyon, sakay ang nahisgutan sa iyang nakaparada nga Mitsubishi Lancer nga may plate number nga LCF 810.
Namatikdan matud pa niini ang mga otoridad nga gapadulong kaniya, hinundgan nga misulay ug sibat, apan giharangan sa sakyanan sa RDEU-12.
Pagnaog sa pulis nga sakay niini, mibunlot matud pa ug pusil si Cortado ug gipabuthan ang mga otoridad.
Hinungdan nga gibaslan siya, rason nga naigo ug gidala sa balay-tambalanan.
Nakaangkon kini ug samad-pinusilan sa wala nga dughan ug kilid, kung asa kadugayan nakabsan sa kinabuhi.
Samtang, narekober matud pa sa kapulisan sa iyang sakyanan ang usa ka .38 revolver nga may 5 ka bala ug mga drug paraphernalia, ug usa ka metal case nga may lima ka sachet sa shabu.
Gikabutyag nga dugay nang gimonitor sa RDEU-12 ang nahisgutan, gumikan sa iyang pagkalambigit sa iligal nga droga.
