Hugot nga gikondena ug gipanghimakak sa National Historical Commission of the Philippines ang pahayag sa pipila ka Chinese scholars nga nag-ingon nga kabahin matod pa sa Taiwan ang Batanes Islands ug kinahanglan ipailalom sa soberanya sa China.
Sumala sa NHCP, hinimo-himo lamang ang maong pag-angkon ug walay bisan unsang basehan sa kasaysayan o siyensya. Base sa report, nagpahigayon ang mga Chinese scholars og symposium sa Jinan University niadtong Hunyo 30, 2026, diin ilang giingon nga ang Batanes usa ka “natural geographic extension” sa Taiwan ug kaniadto sakop sa Taiwan prefecture panahon sa Ming ug Qing Dynasties.
Gipanghimakak kini sa NHCP, nga nag-ingon nga ang mga sinulat sa British explorer nga si William Dampier niadtong 1687 walay bisan unsang ebidensya nga nagpakita nga gimandoan sa China ang Batanes. Hinuon, klaro sa kasaysayan nga ang mga Ivatan adunay kaugalingong komunidad ug aktibong patigayon.
Dugang pa sa NHCP, sukad pa niadtong 1783, giila na sa gobyernong Espanyol ang Batanes isip kabahin sa lalawigan sa Cagayan, ug sukad niadto padayon na kining nahimong kabahin sa kasaysayan ug pangagamhanan sa Pilipinas. Atol sa Philippine Revolution ug Malolos Congress, aduna na usab representasyon ang mga Ivatan isip kabahin sa nasudnong lehislatura.
Gipanghimakak usab sa NHCP ang argumento nga kinahanglan ibalik sa Japan sa China ang Batanes human sa Ikaduhang Gubat sa Kalibutan, tungod kay ang mga Ivatan mismo ang nagpagawas sa ilang yutang natawhan gikan sa panakop sa Hapon niadtong 1945. Sa ilang pahayag, gipasabot sa NHCP nga ang Batanes kanunay nga kabahin sa Pilipinas, adunay kaugalingong lokal nga pangagamhanan, ug giila sa tibuok kalibotan isip lehitimong teritoryo sa nasud.
Gibarugan sa ahensya nga walay bili ang mga pahayag sa pipila ka Chinese scholars ug nanawagan kini sa mga institusyong akademiko nga magpabiling matinud-anon sa tinuod nga panukiduki ug kasaysayan. Dugang pa sa NHCP, walay bisan unsang bakak nga makapapas sa kamatuoran sa kasaysayan sa Pilipinas ug sa Batanes isip lehitimong kabahin sa atong nasud.
