GENERAL SANTOS CITY- Giangkon ni NFA Provincial Manager Dionisio Hectin nga hangtod karon wala pa miabot ang giangkat nga bugas gikan sa Thailand ug Vietnam.
Sa pakighinabi sa Bombo Radyo, gibutyag ni Hectin nga base sa ilang gilauman, May 31 kinahanglang maka-deliver na ang ilang supplier gikan sa Thailand, apan hangtod karon wala pay abiso kanila.
Samtang, ang supplier matud pa gikan sa Vietnam ang nag-abiso na kanila, kung asa gikatakdang muabot sa Hunyo 10 o 11 dinhi sa nasud, ug gibanabanaang ma-deliver kanila sa Hunyo 15.
Nasayran nga tig-5000 metric tons ang giangkat nga bugas gikan sa duha ka nasud, kung asa 3,500 MT ang gilaumang maadto sa Region 11, samtang ang 6,500 MT ang maadto sa Region 12.
Kahibaluan nga ang GenSan ilawom sa NFA-11. Kon muabot na ang giangkat nga bugas, gisiguro ni Hectin nga mahimo nang medyo bastante ang suplay sa bugas dinhi sa Rehiyon 11 ug 12.
