GENERAL SANTOS CITY- Grabe na ang mismanagement ug incompetence sa National Food Authority.
Kini gibutyag ni Sen. Bam Aquino sa pakighinabi sa Bombo Radyo, human ang gipahigayong pagdungog miaging adlaw. Sumala pa nga halos usa ka tuig nang wala nahimo sa NFA ang mandato kanila nga kinahanglang aduna silay 15-day buffer stock sa ilang mga warehouse.
Kini luyo sa ginabutyag nga rason sa ahensya nga walay mag-uuma nga gabaligya kanila ug humay tungod sa hilabihan ka barato nga pagpalit nga mukabat lamang sa P17 matag kilo.
Apan migawas matud pa nga may mga mag-uuma nga nagkanayon nga wala gapalit kanila ang NFA, nga nagresulta sa pagkahurot sa ilang buffer stock ug pag-usbaw sa presyo sa bugas.
Kahibaluan nga sa bulan sa Hunyo pa gilaumang muabot ang giimport nga bugas sa nasud, hinungdan nga didto pa lamang usab posibleng mukunhod ang presyo sa bugas.
Apan gibasol ni Sen. Aquino ang NFA nga unta adunay stock, ug dili nila kanunay’ng ginapadayag nga mahurotay na ang ilang stock, dili unta usab muusbaw nga muusbaw ang presyo sa bugas sa nasud.
Hinungdan nga ilang nakita nga tungod usa ka tuig nang ginapasagdan sa ahensya nga mahurot ang ilang stock, hinungdan nga gapataas nga gapataas usab ang presyo sa bugas sa nasud.
Samtang, sama sa ubang senador nga nagpadayag sa ilang habig, gatuo usab si Sen. Aquino nga gikinahanglan na nga hulipan ang mga opisyal sa NFA.
Sumala pa nga kon dili makaya sa mga kasamtangang opisyal ang mga responsibilidad sa ahensya, angayan lamang nga panghulipan na sila.
Dili usab kumbinsido ang nasampit nga senador sa ginaduso nga solusyon sa NFA nga mag-import na lamang una ug bugas, nga katingalahan matud pa gumikan bastante ang produksyon sa bugas.
Sumala pa nga kon sa Hunyo pa gilaumang muabot ang unang batch sa ilang giimport nga bugas, walay laing mahimo ang katawhan nga antuson una sa mga musunod nga bulan una ang Hunyo, ang taas nga presyo sa bugas.
Alang kang Sen. Aquino, kinahanglang sutaon kon tinuod ang ginabutyag sa ahensya nga walay mga mag-uuma nga gabaligya kanila sa presyo nga P17, o kon wala lamang gayud gapalit ang ahensya sa nasampit nga presyo.
Sumala pa nga miuyon na ang ubang senador sa NFA council nga himuong P18 ang palit sa humay aron matabangan usab ang mag-uuma.
