GENSAN – Ipatawag sa National Food Authority (NFA) GenSan ang tag-iya sa warehouse kung asa nadiskubrehan sa mga otoridad ang gatusan ka sako sa NFA rice nga gi-rebag aron himuong commercial rice.
Matud kang NFA provinial manager Donesio Hectin, buot nilang masayran kon sa unsa nakabaton ug susama kadaghan nga sako nga NFA rice, ang usa ka certain Mr. Tamone, usa ka trader ug miller nga taga-Esperanza, Sultan Kudarat, nga maoy tag-iya sa CT Warehouse Complex sa Diversion Road sa Brgy Apopong ning siyudad.
Kahibaluan nga atua matud pa kini sa Kauluhan dihang gisulod sa mga personahe sa National Bureau of Investigation (NBI) ang iyang warehouse.
Kahinumduman nga nakaplagan sa mga otoridad ang mukabat sa 91 sako sa bugas nga na-rebag na, samtang 62 ka sako ang natahi na, ug laing 145 ka sako nga naablehan, gawas pa sa pipila ka mga mga construction materials.
Dugang pa ni Hectin, kini ang unang higayon nga nakadiskubre sila ug bodega nga may NFA rice.
Gumikan niini, gipasalig sa opisyal nga kasuhan ug unauthorized possession of government rice ug rebagging of government stock of commercial rice ang responsable sa pag-stock ug pagrebag sa NFA rice.
