Misaka na sa 781 ang gidaghanon sa namatay tungod sa grabeng flash floods sa Nepal, samtang kapin 2,500 ka mga tawo ang gikatahong missing.
Sumala sa disaster authority sa Nepal, misulod na sa ikalimang adlaw ang search and rescue operations aron pangitaon ang mga nawagtang ug luwason ang mga tawo nga natanggong sa mga lugar nga apektado.
Narekober na ang mga lawas sa mga biktima gikan sa walo ka apektadong distrito. Samtang nagpadayon ang operasyon, nag-atubang ang mga rescuers sa lapok, kusog nga pagtaas sa tubig sa mga suba, ug usa ka bag-ong naporma nga linaw nga mahimong makapalisod pa sa pagpangita sa mga missing.
Sa kasikbit nga Tibet, China, gikumpirma usab sa Chinese state media nga 16 ang namatay ug 546 ang missing tungod sa maong kalamidad.
Nagsugod na usab ang Nepal sa paglubong sa pipila sa mga namatay. Apan una nilang gikuhaan og DNA samples ang mga lawas aron matabangan sa pag-ila sa mga biktima ug aron mahatag kini sa ilang mga pamilya alang sa tukmang paglubong ug tradisyonal nga mga seremonyas.
