GENERAL SANTOS CITY- Patay ang usa ka negosyante human gipusil sa Brgy Atlae, Malungon, Sarangani.
Base sa report gikan sa Malungon Municipal Police Station, ang biktima giilang si Rezt Mediodia, 47 anyos, negosyante nga gapamalit ug mais sa Malungon, ug residente sa Acmonan, Tupi, South Cotabato.
Natigayon matud pa ang insidente kagahapon sa udto, samtang galingkod sa usa ka waiting shed ang biktima, dihang kalit giduulan sa suspek dayon gipusil sa usa ka tawo nga naka-bonnet.
Nakahimo pa sa pagdagan ang biktima apan naabtan ug gidul-it ug pusil, nga maoy hinungdan sa iyang hinanaling kamatayon.
Matud sa mga residente sa lugar, gilayong misibat paingon sa kasagingan ang namusil ug gituuhang nag-ilis gumikan sa narekober sa kapulisan nga mga sapot niini.
Sa inisyal nga impormasyon, nakita matud pa ang suspek nga migamit ug shotgun ug caliber .45 pistol.
Ginasuta pa kon pila ang igo-pinusilan sa biktima. Kasamtangang nagpadayon ang imbestigasyon sa kapulisan, aron mailhan ang namusil, ug ang motibo sa gihimong krimen.
