Gipahibalo sa Notre Dame of Dadiangas University (NDDU) ang resulta sa ilang inspeksiyon sa mga pasilidad human sa kusog nga linog nga miigo sa Mindanao.
Sumala sa administrasyon sa unibersidad, nahuman na ang assessment sa Main, Lagao, Espina ug Glamang Campuses diin nakit-an ang pipila ka mga building nga naapektuhan sa pag-uyog sa yuta.
Sa Main Campus, gibutangan og red tag ug dili na tugotan nga gamiton ang Henry Ruiz Building ug Leonard Sonza Building, samtang yellow tag usab ang Michael O’Keefe Building ug Covered Area 1 tungod sa kadaot nga nasinati.
Sa Lagao Campus, gideklara usab nga kinahanglan nang gub-on ang Elementary Building tungod sa grabeng kadaot nga nahitabo niini.
Gipatawag usab sa NDDU ang mga structural engineers aron mas lawom nga masusi ang kahimtang sa mga pasilidad ug matabangan ang proseso sa rehabilitasyon. Giingon sa unibersidad nga luwas pa gamiton ang ubang mga building sa ilang mga kampus.
Bisan pa sa kadaot, nagpadayon ang NDDU sa pagtabang sa mga naapektuhan sa linog pinaagi sa relief operations ug mga donasyon, samtang nagpahayag og pasalamat sa tanang mitabang sa ilang paningkamot sa pagbangon.
