Gikatakdang magpagawas og subpoena sa Lunes ang National Bureau of Investigation (NBI) batok sa pipila ka mga indibidwal nga miyembro sa Philippine Southeast Asian Games Organizing Committee (PHISGOC).
Ang maong lakang kabahin sa pagsugod sa ilang imbestigasyon may kalabotan sa giingong mga anomalya nga nadiskubrehan sa 2019 Southeast Asian Games.
Sumala kang NBI Director Atty. Melvin Matibag, nakakuha sila og kopya sa General Information Sheets sa PHISGOC gikan 2019 hangtod 2026, lakip na ang mga financial ug audited financial statements nga gamiton isip basehan sa ilang imbestigasyon.
Natutokan sa ilang imbestigasyon ang kapin P650 milyon nga gasto sa renta ug kapin P300 milyon nga consultancy fees.
Wala makita sa listahan ang ngalan ni Senador Alan Peter Cayetano, nga mao ang nangulo kaniadto sa PHISGOC. Matud sa hepe sa NBI, usa usab kini sa ilang susihon isip kabahin sa imbestigasyon.
Usa sa mga gustong klarohon sa NBI mao ang papel, kung aduna man, ni Cayetano sa maong organisasyon ug kung nganong wala migawas ang iyang ngalan sa corporate records sa PHISGOC.
Kahinumduman nga ang 2019 SEA Games gipahigayon sa Pilipinas diin si Senador Alan Peter Cayetano ang nangulo sa pagdumala sa maong komite.
