GENERAL SANTOS CITY – Mukabat na sa 251 ang reklamanteng sibilyan nga pormal nang nagpasang-at ug kaso batok sa Police Paluwagan Movement kon PPM.
Base sa report sa National Bureau of Investigation-Sarangani District Office (NBI-SARDO), lakip niini ang pipila ka mga recruiter nga nakahulog ug dakong kantidad sa salapi nga mukabat ngadto sa milyones ka pesos.
Gikumpirma sa NBI-SARDO nga miabot sa halos P900 million ang claim sa mga reklamante.
Ug gilauman sa buhatan ni Agent Regner Pineza nga madugangan pa ang ihap sa magreklamo batok kay Shiela Agustin og sa uban pang nalambigit sa PPM.
Kahibaluan nga gikasuhan na sa NBI ug syndicated estafa si Agustin nga gitudlong utok sa operasyon sa PPM.
Samtang padayong giimbestigahan ang pipila ka opisyal sa kapulisan sa dakbayan og sa rehiyon dose human gipangpanganlan ni Agustin nga may kalambigitan sa PPM nga kasagaran sa mga nabiktima mga tigpatuman sa balaud.
Una niini, gihingusgan ni Agent Pineza nga wala nila gitulugan ang mga kaso batok sa PPM.
Kini human sa pahayag sa mga biktima nga napasagdan ug wala na silay nakuhang update kalabot sa kaso batok sa PPM.
Samtang, dili mawad-an og mga tawo ang atubang sa YBS Law firm sa Brgy. Lagao ning syudad nga buot nga makakuha sa ilang claim human nga magbutang og salapi sa PPM.
Kini human nga gisugdan sa maong law firm ang pag-schedule sa pag-release ug refund sa mga valid nga claimant.
Ang mga ma-release-an lamang mao kadtong claimants nga na-authenticate ang ilang bank receipts og money transfer transaction pamatuod nga naka-invest gayud og salapi kay Agustin.
Gikabutyag nga may ubang claim nga nabayaran na samtang ang uban nagpaabot sa notice nga ilang madawat gikan sa law firm kung asa may detalye kanus-a ang ilang release sa refund, unsaon ug asang lugar makuha ang salapi.
Giklaro sa nasampit nga law firm nga bugti sa refund ang affidavit of desistance pabor kang Agustin nga gikasuhan na og syndicated estafa.
