GENERAL SANTOS CITY – Gisiguro ni Regner Pineza, labaw sa National Bureau of Investigation-Sarangani District Office nga mutuman sa mando nga ipasirado ang Kabus Padatuon o KAPA Community Ministry International Inc.
Sa pakighinabi sa Bombo Radyo GenSan, gibutyag sa opisyal gipaabot na lamang nila ang mga dokumento og opisyal nga mando nga maggikan sa ilang head office humanz sa nahimong pahayag ni Pangulong Rodrigo Duterte sa NBI og Criminal Investigation and Detection Group nga ipasirado na ang KAPA.
Sa pakighinabi ni Pastor Apollo Quiboloy, gitawag pa sa Pangulo nga syndicated estafa ang ginahimo sa KAPA hinungdan kinahanglan nga gilayong ipasirado.
Sa pahayag pa ni Pangulong Duterte nga bisan ang Bangko Sentral ng Pilipinas o Bank of America wala gahatag og 30 porsyento nga kita sa investment, susama sa gitanyag sa KAPA sa ilang mga miyembro.
Nasayran nga gi-refer na ng Business Permits and Licenses Division sa lungsod sa City Legal Office ang kalabutan sa legalidad sa operasyon sa KAPA sa GenSan alang sa sunod nga ipahigayong lakang.
Kini human pakyas nga makapakita ang mga sakop sa KAPA og board resolution nga naghatag sa ilaha og pagtugot nga maka-operate sa GenSan, tungod anaa sa Alabel, Sarangani Province ang ilang main office.
Nahitabo kini dihang mag-inspection ang taga BPLD sa mga investment group sa lungsod sa miaging semana.
Wala usay napakita nga bag-ong Securities and Exchange Commission (SEC) registration ang KAPA, human kini gi-revoke sa komisyon sa miaging mga bulan.
