Gikumpirma sa National Bureau of Investigation (NBI) nga nakakuha sila og important ug sensitibong mga dokumento sa condo unit ni kanhi Ako Bicol Partylist Representative Zaldy Co sa Bonifacio Global City, Taguig.
Sumala ni NBI Spokesperson Atty. Palmer Mallari, tulo ka vaults ang ilang naablihan atol sa operasyon, ug gikan niini nakarekober sila og daghang dokumentong gituohang magamit sa nagpadayon nga imbestigasyon kabahin sa iskandalo sa mga flood control projects.
Padayon karon ang inventory sa mga dokumento nga nakuha sa lugar, ug giingon sa NBI nga kini nga mga papel kasagarang naglangkob sa kritikal nga ebidensiya nga makapadasig sa kaso batok kang Co.
Isusumite usab sa NBI ang ilang opisyal nga post-operation report ngadto sa Taguig City Regional Trial Court, nga mao’y nagpagawas sa warrant nga gigamit sa pagsulod sa condo. Ang maong warrant mas lapad og sakop kumpara sa nauna, kay nagtugot kini sa mga otoridad nga ablihan ang bisan unsang vault nga ilang makaplagan ug kumpiskahon ang mga dokumento ug kwarta nga adunay kalambigitan sa kaso.
Bisan pa man, giingon sa NBI nga gamay ra ang nakuhang cash sa lugar, nga mokabat lamang sa ₱10,000, ug wala kini mawala sa pagtuo nga ang mga dokumento mao gyud ang mas importante nga bahin sa ebidensya.
Ang mga reklamo batok kang Zaldy Co naglakip sa graft, malversation, ug uban pang kalapasan nga may kalabotan sa giingong sayop nga paggamit sa pondo alang sa flood control projects. Padayon ang imbestigasyon samtang gihulat ang sunod nga legal nga lakang batok sa kanhi mambabalaod.
