Nipasaka ug kaso ang National Bureau of Investigation (NBI) batok sa napulo ka mga indibidwal nga giingong nagpakatap og peke nga impormasyon online.
Karong semanaha, upat ka mga overseas Filipino workers (OFWs) ang gipasakaan na usab og kaso tungod sa giingong paggamit sa edited video clip ni NBI Director Jaime Santiago gikan sa usa ka forum nga iyang gitambongan bag-o lang.
Dinhi kuno sila nagpakita kaniya nga nanghulga sa mga OFW. Matod sa kadagkoan sa NBI, naghinobra na ang pagkuyanap sa fake news sa nasud nga naghulga sa nagkadaiyang sektor.
Matod niya, kinahanglang pugngan kini aron malikayan ang kadaot nga mugnaon ilabina kon makaapekto usab kini sa nasudnong seguridad.
Gipasiugda sa retirado nga huwes sa Regional Trial Court nga ang peke nga balita sa nasud sama sa usa ka pandemya, nga ang pipila sa mga nagpakaylap niini gihimo lamang kini ingon usa ka komedya.
Ang uban, matod niya, naghimo karon niini isip panginabuhian diin sila mokita gikan sa peke nga online content.
Ang kadagkoan sa NBI nisaad nga magpadayon ang pagpasaka og kaso batok sa mga fake news peddlers ug kon ma-isyu ang ilang warrant of arrest, matod niya, dakpon dayon sila.
