Gipahibalo sa National Bureau of Investigation nga ilang dayon nga itugyan sa Department of Justice si Senador Ronald dela Rosa sa higayon nga malampuson nila siyang madakpan.
Sumala ni NBI Director Atty. Melvin Matibag, ilang i-turn over ang senador ngadto sa DOJ kung madakpan na kini sa ilang mga operatiba. Mao kini ang sunod nga lakang sa gobyerno sa pagpatuman sa arrest warrant nga giisyu sa International Criminal Court batok kang Dela Rosa.
Giingon usab sa direktor nga ang DOJ na ang bahala sa pagproseso sa kaso ug sa posibleng pagdala sa senador ngadto sa international tribunal sa gawas sa nasod.
Sa laing bahin, wala gikompirma sa DOJ kung ilang dayon dad-on si Dela Rosa sa The Hague, Netherlands. Sumala ni Justice Secretary Frederick Vida, operational matters ang maong isyu ug dili kini mahimong hisgutan sa publiko.
Giingon niya nga likayan nila ang bisan unsang mahimong makaapekto sa tumong nga madala si Dela Rosa sa international tribunal.
Usa ang NBI sa gimandoan sa DOJ aron manguna sa implementasyon sa warrant batok sa senador.
Bag-ohay lang usab nga gimandoan sa DOJ ang NBI nga dakpon si Dela Rosa human ibasura sa Supreme Court ang hangyo sa senador alang sa interim relief nga makapugong sa iyang pag-aresto ug pagsilbi sa warrant gikan sa international tribunal.
Bisan pa niini, giangkon ni Director Matibag nga sa pagkakaron wala pa silay gitakdang timeline kung kanus-a eksaktong madakpan si Senador Dela Rosa.
