Gipaklaro ni National Bureau of Investigation (NBI) Director Melvin Matibag nga dili mahimong isilbi ang arrest warrant sa mga abogado ni Senador Ronald “Bato” dela Rosa, nga gipangita karon sa mga awtoridad may kalabotan sa arrest warrant gikan sa International Criminal Court (ICC).
Giingon sa NBI Director nga kinahanglan personal nga isilbi ang maong warrant sa tawo nga ginadakop, subay sa nakabutang sa Rules of Court.
Sumala ni Matibag, wala siya kahibalo kung asa gikan ang ideya nga ihatag ang warrant sa abogado ug ang abogado maoy mohatag niini sa senador. Posible, matod pa niya, nga adunay kalibog o “mix-up” tali sa naunang gi-issue nga subpoena, summon, ug sa warrant.
Gihimo ni NBI Chief ang pagpaklaro human mikaylap ang video sa abogado ni dela Rosa nga si Atty. Jimmy Bondoc sa usa ka panayam kaniya, diin giingon nga mahimong isilbi ang ICC arrest warrant sa mga abogado sa senador.
Gihinumdoman sa abogado ang misulay nga pagsilbi niadtong Mayo 11 sa arrest warrant kang kanhi Senador Antonio Trillanes IV. Gipamatud-an usab ni Atty. Bondoc nga dili mahimong ipatuman ang ICC warrant gawas kung ipagawas kini o ipasunod sa Korte Suprema.
