GENERAL SANTOS CITY – Gipaabot na lang sa National Bureau of Investigation (NBI) Sarangani-GenSan District Office, ang resulta sa gihimong autopsy sa patay’ng lawas ni Jan Raphael Eco, 22-anyos, nga napusilan-patay sa sakop sa CDEU, human matud pa misukol sa gipahigayon nilang buy-bust operation.
Sa pakighinabi sa Bombo Radyo kang Regner Pineza, district head sa NBI-SarDo, sugdan nila ang pag-imbestiga sa oras nga mahuptan na ang resulta sa autopsy nga gipahigayon ni Dr. Ricardo Rodaje sa patay’ng lawas ni Eco.
Kahinumduman nga mihangyo ang pamilya Eco ngadto sa NBI nga magpahigayon ug mas lawom nga imbestigahan ang pagkamatay sa ilang mahal sa kinabuhi, gumikan duda sila sa taho sa CDEU nga misulay kini ug sibat ug sukol sa kapulisan nga nagpahigayon sa operasyon.
Gikwestiyon usab ang nahimong operasyon, gumikan gihingusgan sa pamilya Eco ug mga higala niini nga wala nalambigit sa unsa mang iligal nga gimbuhaton ang anak hilabi na sa iligal nga droga, lakip ang paghupot ug armas.
Apan una nang gihingusgan sa CDEU nga lehitimo ang naasoy’ng operasyon, lakip ang mga narekober nga iligal nga droga kang Jan Raphael, hinungdan nga andam silang muatubang sa unsa mang imbestigasyon.
