Gipaabot sa House prosecution nga adunay mahinungdanong impormasyon nga ipadayag ni National Bureau of Investigation (NBI) Director Melvin Matibag may kalabotan sa imbestigasyon sa giingong pagpanghulga ni Vice President Sara Duterte batok kang Presidente Ferdinand Marcos Jr. ug iyang pamilya.
Matud ni House prosecutor Terry Ridon, dili pa nila ipadayag ang detalye sa testimonya ni Matibag aron mapadayon ang gipaabot nilang “pasabog” sa pagdungog.
Si Matibag mao ang mahimong katapusang saksi sa prosekusyon ubos sa Article IV sa impeachment complaint, nga naghisgot sa mga pahayag ni Duterte batok sa Pangulo, First Lady Liza Araneta-Marcos, ug kanhing Speaker Martin Romualdez.
Gipasabot ni Ridon nga ipresenta ni Matibag ang kinatibuk-ang resulta sa imbestigasyon sa NBI ug ang papel sa nagkalain-laing opisina sa ahensya aron maporma ang tibuok hulagway sa kaso.
