Nagsumite si National Bureau of Investigation (NBI) director Jaime Santiago sa iyang irrevocable resignation.
Sa sulat nga gisumite ngadto kang Presidente Ferdinand Marcos pinaagi ni Executive Secretary Lucas Bersamin, niingon siya nga mokanaog dayon siya sa iyang puwesto kon adunay mopuli.
Nalatid usab sa sulat nga dili na niya maagwanta ang pagbutang-butang ug intriga batok kaniya.
Gipasalamatan niya ang administrasyong Marcos ug gipasalig ang padayon nga pagsuporta sa administrasyon niini.
Dihang gidawat niya ang trabaho, nipasalig siya nga limpiyohan niya ang ahensya sa mga scalawags.
Nagsugod ang pagbutang-butang kaniya dihang nisumite siya og courtesy resignation uban sa pipila ka mga opisyal sa gobyerno tungod sa mando ni Pres. Marcos.
Giingong interesado sa iyang posisyon ang mga tawo nga giingong naninguha pagdaot sa iyang imahe.
Si Santiago, kanhi trial court judge, prosecutor ug Manila police officer, gitudlo nga NBI Chief kaniadtong Hunyo sa miaging tuig.
