GENERAL SANTOS CITY – Gipresenta na kagahapong adlawa si John Eliser Caban, ang gikaingong usa ka hired killer nga suspek matud pa sa pipila ka mga pagpamusil-patay dinhi sa siyudad ug mga kasikbit nga lugar.
Gipahigayon kini sa Lanton City Jail kung asa kasamtangang nakabilanggo ang nahisgutan, nga gitambungan sa pamilya sa mga nahimong biktima niini, luyo nga wala personal nga miatubang si Caban.
Matud kang Gen. Marcelo Morales, regional director sa Police Regional Office 12, nasikop si Caban kaniadtong Mayo 29, dihang mutambong unta ug hearing sa Digos, apan giatangan sa mga otoridad.
Nag-atubang matud pa si Caban ug 13 ka ihap sa kasong murder ug usa ka frustrated murder, ug may warrant of arrest dinhi sa siyudad.
Matud kang Gen. Morales, gumikan kini nakita mismo si Caban sa kauban sa iyang mga nahimong biktima, o kaha pinaagi sa paghulagway sa nakakita kaniya, dihang gihimo ang krimen.
Gituuhang wala kini nag-inusara ug naay mga kauban o nagbayad kaniya aron himuon ang sa ingon.
Sa karon, padayon ang ginahimong imbestigasyon sa mga otoridad kang Caban, kung asa lakip nga ginasuta ang background sa mga biktima, aron matumbok ang motibo ug rason.
Giangkon usab ni Morales nga ang uban sa mga biktima ang may kanhing record sa kalambigitan nga krimen.
Sumala pa nga may nabutyag na kaniadto si Caban ngadto kanila apan gibakwi niini, nga posibleng gumikan sa tambag sa iyang abugado.
Apan andam matud pa kining ibutyag ang tanan pag-abot sa korte.
