Anaa na karon sa kustodiya sa Philippine Coast Guard (PCG) ang na-stranded nga MV Mirola 1 sa baybayon sa Mariveles, Bataan.
Matod ni PCG Bataan Station commander Lieutenant Commander Michael John Encina, nagpagawas na sila og inspection enforcement apprehension sa nasangpit nga barko aron masuta kon aduna ba kini laing kalapasan nga nahimo ug unsa nga kasong administratibo ang mahimong ipasaka.
Gawas niini, ang commander sa PCG Bataan Station niingon nga gipatawag na usab ang tag-iya sa maong merchant vessel.
Kaniadtong Miyerkules, ang Senate panel nag-isyu og subpoena sa mga tag-iya sa MTKR Jason Bradley ug MV Mirola 1 human sila napakyas sa pagtunga sa hearing.
Una niini, gibutyag sa PCG ug NBI nga ilang gisusi kon ang 2 ka barko lakip na ang MT Terranova nalambigit sa oil smuggling o gitawag nga ‘pa-ihi’.
