GENERAL SANTOS CITY – Gikan sa kanhing ihap nga 17, misaka na sa 20 ka indibidwal ang namatay tungod sa suspected measles outbreak sa Upper Suyan, Malapatan.
Kini ang gikumpirma ni Sarangani Provincial Health Office, sa pakighinabi sa Bombo Radyo kanilang Federico Yadao, medical technologist ug Dr Alvin Alejandro, Provincial Health Officer II, kung asa kaniadtong Sabado ulahing may nadugang nga duha ka indibidwal nga namatay tungod sa maong sakit.
Gawas niini, mukabat matud pa sa 97 ang nataptan sa maong sakit sa maong lugar.
Matud ni Dr. Alejandro, ang kumplikasyon sa measles mao ang sagad nga rason nganong mamatay ang usa ka pasyente.
Sumala pa nga ang mga kumplikasyon sa tipdas mao ang pneumonia ug infection sa utok, apan sagad sa mga namatay ang tungod sa pneumonia, sa 20 nga namatay.
Base sa mga nakita nila nga mga pasyente sa nasampit nga lugar mao ang hilanat, rashes, conjunctivities kon gapula ang mga mata, ug sip-on ug ubo.
Sumala pa ni Dr. Alejandro nga kon makita ang mga susamang sintomas, angayan nang dal-on sa ospital ang pasyente.
Apan nasayran nga mukabat sa unom ngadto sa pito ka oras matud pa aron makaabot sa lugar sa Upper Suyan nga apektado sa gituuhang outbreak sa tipdas.
Hinungdan nga daghan sa mga apektadong residente ang malisdan nga madala sa ospital ang ilang mahal sa kinabuhi nga nataptan sa sakit.
