Misaka ang gidaghanon sa mga namatay sa pipila ka mga nasod sa Europa tungod sa nagpadayon nga grabeng heatwave nga miigo sa rehiyon sukad sa katapusan nga semana sa Hunyo.
Sa France, miabot na sa dul-an 2,025 ang naitalang excess deaths, o mga kamatayon nga mas taas kaysa kasagarang gidaghanon sa maong panahon. Sumala sa mga otoridad sa panglawas, 30 percent kini nga mas taas kon itandi sa miaging semana. Kadaghanan sa mga namatay anaa sa edad nga 45 anyos pataas.
Kaniadtong Hunyo 24, nasinati sa France ang usa sa labing init nga mga adlaw sa kasaysayan sa nasod diin miabot sa halos 41 degrees Celsius ang temperatura sa Paris.
Tungod niini, gipailalom sa red heat alert ang katunga sa nasod, samtang gipaabot nga mosaka pag-usab sa 40 degrees Celsius ang temperatura sa habagatang bahin sa France.
Gipagawas usab sa gobyerno ang red alert status tungod sa hulga sa mga sunog sa kalasangan. Sa pinakabag-ong datos, kapin 7,000 na ka mga sunog ang naitala sukad nagsugod ang ting-init nga misunog sa mga 8,700 ka ektarya nga yuta ug nagresulta sa pagbalhin sa liboan ka mga residente.
Sa Belgium, miabot sa 1,222 ang natalang excess deaths, nga 39 porsiyento ang pagsaka kon itandi sa naunang semana. Halos katunga sa mga namatay anaa sa edad nga 85 anyos pataas.
Samtang sa Netherlands, gitaho sa mga otoridad nga adunay gibanabana nga 480 ka excess deaths sa miaging semana.
Kadaghanan sa mga biktima mga senior citizen nga adunay edad nga 80 anyos pataas human miabot sa halos 40 degrees Celsius ang temperatura sa pipila ka bahin sa nasod.
