GENERAL SANTOS CITY – Dalhon sa Davao aron didto i-cremate matud pa ang patay nga lawas sa usa ka Indian human nga nalambigit sa aksidente sa National Higway, Brgy Baluan, Martes sa buntag, nga nagresulta sa kamatayon niini.
Kahibaluan nga gisulayan pang salbaron sa emergency room ang biktima nga si Kulwir Singh, 40 anyos apan nakabsan gihapon sa kinabuhi.
Nasayran nga walay panimuot og nagkadugo nga gidala kini sa Dr. Jorge P. Royeca Hospital.
Matud pa ni Police Chief Insp. Ruelito Lumiguid, labaw sa Traffic Management Unit, ang motorsiklo nga Yamaha Giga nga gimanehuan sa Indian og ang Toyota BB nga maneho ni Rodolfo Garcia ang parehong paingon sa Brgy. Buayan pasado alas nuebe sa buntag kagahapon.
Apan pag-abot sa Purok Francisco Baluan, samtang anaa sa outer lane, na-overtake ang Indian national sa usa ka traysikel nga anaa sa inner lane.
Wala mabantayan sa nasampit ang Toyota BB ug nibangga. Sa hilabihan kakusog sa impact sa pagkabangga, lumping ang unahan nga bahin sa sakbayan og buak ang wind shield niini.
Nalagpot usab gikan sa iyang motorsiklo ang Indian.
Nagka-areglohanay ang duha ang mga nalambigit sa disgrasya nga tungaan ang tanang galastuhon sa Indian National luyo nga migawas sa imbestigasyon sa TMU nga ang motorsiklo ang may sayop sa aksidente.
