GENERAL SANTOS CITY – Blangko pa ang mga imbestigadro sa San Isidro Police Station sa ilhanan sa responsable sa pagpatay sa patay’ng lawas nga nakaplagan kaniadtong Dominggo sa buntag, sa prk Udagri, Brgy Conel ning siyudad.
Kini ang gibutyag sa Bombo Radyo ni Police Chief Inspector Ananias Vasquez, human nga nailhan na ang biktima nga si Jerry Pelayo Apila, usa ka lechonero, taga- Silway Fatima, Brgy Dadiangas West.
Kini human nga gikuha na sa iyang pamilya ang patay’ng lawas sa biktima. Nasayran nga kaniadtong Sabado sa gabii, nakita pa ang biktima nga may kainom nga duha ka tawo, sulod sa usa ka videoke bar.
Ug pagka-ugma, nakaplagan na lang ang patay’ng lawas niini nga napuno sa 14 ka samad-dinunggaban, sa may kamaisan sa Brgy Conel.
Nasayran nga ang asawa sa biktima ang gatrabaho sa gawas sa nasud. Usa sa ginatan-aw sa kapulisan ang gikataho nga may nakaaway kaniadto sa trabaho ang biktima.
Sa karon padayong giimbestigahan sa kapulisan ang maong kaso, kung asa ginasuta kon may kalambigitan kini sa laing patay’ng lawas nga unang nakapalagan sa mao gihapong lugar, nga may gulgol sa liog.
