Nahimong hapsay ug malinawon ang gihimong White Ribbon March nga gitambongan sa liboan ka miyembro gikan sa nagkalain-laing grupo sa relihiyon, progresibo nga organisasyon, ug civil society groups.
Human sa misa nga gipangunahan ni Bishop Jose Colin Bagaforo sa EDSA Shrine, gisugdan ang martsa alas-1:30 sa hapon padulong sa EDSA People Power Monument.
Luwas nga nakaabot ang mga partisipante alas-2:00 sa hapon human sa kapin 30 minutos nga paglakaw, dala ang ilang mga placard ug bandera nga adunay panawagan nga “Panubagon ang tanang nalambigit” may kalabotan sa mga isyu sa korapsyon.
Sa pakighinabi sa Bombo Radyo, giingon ni Hannah Shiena Sodela, propesor sa St. Paul University Manila, nga miapil siya aron dasigon ang kabatan-onan nga mahimong mas matinud-anon ug mubarog alang sa maayong panggobyerno.
Gipasiugda usab ni human rights lawyer Maria Kristina Conti nga ang korapsyon mao ang nag-unang hinungdan sa iyang pag-apil sa maong kalihukan, ug iyang gihangyo ang gobyerno nga paminawon ang tingog sa katawhan.
Dugang pa ni Zoe Caballero sa Sentro para sa Tunay na Repormang Agraryo, importante ang malinawon nga mga lihok aron mapakita ang tingog ug kusog sa mga katawhan.
Samtang, gi-report ni PMaj Hazel Asilo, tigpamaba sa NCRPO, nga nagpabiling malinawon ang kahimtang sa Quezon City, alas-3:30 sa hapon, miabot na sa 3,730 ang gibanabanang gidaghanon sa mga tawo sa palibot sa monumento sa pagtapos sa programa alas-8:00 sa gabii.
Kapin 2,000 ka pulis ang gipakatap gikan sa EDSA Shrine hangtod sa People Power Monument aron masiguro ang seguridad sa mga nitambong.
