Nabalaka na karon ang mga residente sa Phase 2, Doña Soledad Extension sa Barangay Apopong human sa sunod-sunod nga pag-ulan nga maoy hinungdan sa pagdako sa bangag sa creek nga duol sa ilang gipuy-an.
Sumala kang Lorena Diaz, usa sa mga residente sa maong lugar, dugay na matod pang problema ang erosion sa creek apan hangtod karon wala pa’y konkretong aksyon nga gihimo aron masulbad kini.
Matud niya, kada kusog sa ulan mas nagkadako ang pagkaguba sa yuta nga delikado na alang sa mga balay nga nahimutang daplin sa creek.
Gikabalak-an usab sa mga residente nga posibleng adunay mga balay nga madaot o maanod kon magpadayon pa ang kusog nga pag-ulan sa umaabot nga mga adlaw.
Tungod niini, ilang gihangyo ang lokal nga panggamhanan nga daliang matan-aw ug mohimo og paagi aron malikayan ang posibleng dakong disgrasya sa lugar.
