GENERAL SANTOS CITY – Giandam na ang mga dokumento alang sa ipasakang kaso sa kapulisan batok sa mga responsable sa pagpamanhig sa mga kapulisan sa Bansalan Davao del Sur sa miaging adlaw.
Kini ang gikumpirma sa Bansalan Municipal Police Station kon asa gibutyag nga multiple murder ang ipasang-at nga kaso ngadto sa mga rebeldeng grupo sa Guerilla Front 51 sa NPA.
Sumala pa ni Po2 Oliver Jerona nga giuntikay pa sa pagkakaron ang ubang teroristang gimbuhaton sa mga naasoyng rebelde alang sa posibleng dugang nga kaso nga ipasaka.
Kahibaluan nga hustisya ang singgit sa tagsa ka pamilya sa upat ka pulis nga namatay sa pagpang-ambush. Nasayran nga igo ra mirespondi ang mga biktima sa insidente sa pagpamusil sa Bansalan.
Kahibaluan nga nagsugod gilayon sa ilang trabaho ang gimugna nga Task Force Sibayan nga maoy mututok sa kaso sa nahitabong pagpang-ambush.
Gimugna sa Police Regional Office (PRO)-11 ang maong grupo aron nga gilayong maimbestigahan ug mapatubag ang nagpaluyo sa krimen.
Gipangunahan kini ni PRO-11 Deputy Regional Director for Operations S/Supt. Valeriano de Leon kinsa mao usay gagunit sa imbestigasyon sa nahitabong Roxas night market bombing kaniadtong Setyembre 2016 didto sa Davao City.
Sumala ni de leon, base sa ilang inisyal nga imbestigasyon, adunay lig-ong basehan nga ang mga miyembro sa New People’s Army (NPA) ang nagpaluyo sa pagpang-ambush.
