GENERAL SANTOS CITY – Patay ang driver sa multicab nga gipusil sulod sa iyang unit sa paradahan sa mga multicab sa Plaza Heneral Santos kagabii.
Giila ang biktima nga si Omar Lucman, 46 anyos, taga-Lanton, Brgy Apopong ning dakbayan.
Gikabutyag nga natigayon ang insidente pasado alas-6:00 sa gabii, samtang naghulat sa iyang torno ang biktima, dihang miabot ang naka-motorsiklong suspek, ug gipusil ang biktima sa ulo gamit ang .45 caliber pistol.
Nakaangkon kini ug samad-pinusilan sa ulo hinungdan nga gidala sa balay-tambalanan.
Matud ni SPO1 Omar Melicano sa Pendatun Police Station, natuyok na nila ang mga CCTV sa mga duol nga establisyimento apan walay nakuha nga footage sa insidente.
Apan padayon nga sutaon ang uban pang mga CCTV footages gikan sa ubang establisyimento alang sa nagpadayong imbestigasyon.
Kasamtangang ginasuta sa kapulisan ang background sa biktima aron masayran ang motibo sa krimen, ug sa ilhanan sa suspek.
Samtang narekober sa crime scene ang usa ka slug ug duha ka basyo sa .45 caliber pistol.
Una nang gikabutyag nga may kalabutan sa rido ang nasampit nga insidente.
Apan gikabutyag sa mga imbestigador nga nalisdan sila sa imbestigasyon gumikan daw sa dili makigkooperar ang mga kabanay sa biktima sa mga pangutana sa kapulisan ug dili usab ipatandog ang lawas sa biktima.
