GENERAL SANTOS CITY – Mukabat sa P5.2 Million ang kantidad sa 130 ka kahon sa smuggled nga sigarilyo nga nakumpiska sa gipahigayong raid sa kapulisan sa usa ka bodega sa Purok Kulasi, Barangay Labangal ning syudad niadtong Lunes.
Kini ang gibutyag ni P/Supt Aldrin Gonzales, tigpamaba sa PRO-12 human ang gihimong inventory sa mga ebidensiya.
Matud pa niini, nagkantidad ug P40, 000 ang kada kahon sa sigarilyo nga gikan sa Indonesia.
Giila ni Gonzales ang naaresto nga tulo ka undocumented Indonesian nationals nga nalambigit sa smuggling nga silang Sugonop Bentelu, 54 anyos; Rafles Pangutesang Salaka, 45, og Aris Bintilo, 26 anyos.
Naaresto na ang mga nasampit duha ka semana na ang nakalabay apan nakapiyansa og nagbalik sa ilang iligal nga aktibidad nga nagresulta sa subling pagkaaresto.
Sa pakighinabi sa Bombo Radyo, gibutyag ni PCSupt Marcelo C. Morales, Regional Director sa PRO-12 nga magsumite sila og mosyon aron pugngan nga makapiyansa pag-usab.
Samtang, gimando ni Morales sa mga sakop ang manhunt operation batuk kay Toto Malik, kinsa tag-iya sa balay kung asa gibutangan sa mga kontrabando human nga pakyas nga madakpan atol sa operasyon.
Ang tulo ka Indonesian ang kasamtangang balhug sa Makar Police Station og gitakdang itugyan sa kapulisan sa Bureau of Immigration human ang pagpasaka og kaso.
