Nagpahayag ang Mindanao State University – General Santos (MSU-Gensan) og dako kaayong kasubo ug hugot nga pagkondena sa brutal ug walay hustisya nga pagpatay kang Miyuki Kim, usa ka graduating student sa College of Fisheries and Aquatic Sciences, nga nakaplagan nga patay sa ilang panimalay sa Purok DBP, Barangay Apopong, Gensan niadtong Disyembre 8 2025.
Sumala sa MSU-Gensan, walay estudyante o miyembro sa komunidad ang angay makasinati og ingon ani nga kapintasan.
Gihangyo sa unibersidad ang mga otoridad nga paspason ang imbestigasyon aron madala dayon sa hustisya ug malikayan nga mausab ang sa susamang trahedya. Nagpadala usab kini og mapainubsanon nga pakig-ambit sa kasubo sa pamilya ni Miyuki ug nagpahayag sa pakig-uban sa mga kauban niyang estudyante samtang nagpadayon ang kolaborasyon sa mga ahensya sa seguridad aron masiguro ang kaluwasan sa tibuok komunidad.
Sumala kay Cyrille Mae Marcilla, Secretary General sa Fisheries Student Organization, maghimo sila og candle lighting karong adlawa, alas-5 sa hapon, isip pagpakita sa pagkondena sa insidente ug panawagan sa hustisya para kang Miyuki. Gihangyo usab sa pamunuan ang tanan nga moapil nga magsul-ob ug itom nga sanina isip simbolo sa pakig-ambit.
