Nagtuo si Senador Francis “Kiko” Pangilinan nga adunay misapprehension of the facts o wala pagsinabtanay sa mga detalye sa dihang ang Korte Suprema mihukom nga i-dismiss ang impeachment case batok kang Bise Presidente Sara Duterte.
Matod sa senador, ang Motion for Reconsideration (MR) maoy kahigayonan sa pagtul-id niini.
Gipasabot ni Pangilinan nganong nagtuo siya nga premature na ang pag-archive sa Senado sa impeachment complaint bisan pa man nga adunay nag-ung-ong nga MR gikan sa Kamara nga nagtinguha nga balihon ang desisyon sa Korte Suprema nga nagdeklara sa kaso nga unconstitutional.
Gihingusgan niya nga ang desisyon sa Korte Suprema gibase sa usa ka misinterpretation sa usa ka report sa TV network, nga giklaro mismo sa istasyon sa usa ka opisyal nga pahayag.
Gibutyag usab niya nga dili mahimong basehanan sa Korte Suprema ang usa ka tuig nga lagda sa bar aron ibasura ang kasong impeachment batok kang Duterte tungod kay ang unang tulo ka reklamo wa pa opisyal nga napasaka sa wala pa mapasaka ug ma-advance ang ikaupat nga reklamo.
Kahinumdoman ni Pangilinan nga mibotar siya og “no” sa pag-archive sa Articles of Impeachment atol sa sesyon sa Senado kaniadtong Agosto 6, ug niinsistir nga kinahanglang paabuton ang desisyon sa MR nga pending sa Korte Suprema.
