General Santos City | Padayon pang nag-imbestiga ang kapulisan sa posibleng motibo sa pagpusil patay sa usa ka tricycle driver sa Sampaguita Street, Corner Zapote, Brgy. Dadiangas East, GenSan.
Kahinumduman nga ang biktima ang nailhan sa pangalan nga si Victor Viagedor, anaa sa hamtong nga pangidaron, minyo, residente sa Prk. 3, New Society, Brgy. Apopong ning syudad. Sa imbestigasyon sa kapulisan, ala-una sa hapon kagahapong adlawa gipusil ang biktima sa wala pa mailhing suspetsado. Dali nga gidala ang nahisgutan sa tambalanan apan gideklara kini nga patay na sa attending physician nga si Dr. Al Kareem Nawal.
Nasuta nga naigo ang biktima sa likod nga parte sa iyang lawas ug milapos kini sa iyang atubangan nga maoy hinungdan nga nakutluan ug kinabuhi.
Narekober sa crime scene ang usa ka bala sa 9mm nga pusil. Samtang gibutyag sa kabanay sa biktima nga si Malvin Viagedor, presidente sa toda sa mga tricycle ang biktima ug kung adunay makaaway ang iyang mga myembro siya ang mo-areglo.
Tumang kasubo ang nasinatian sa pamilya niini tungod bag-ohay lang usab namatay ang asawa tungod adunay sakit. Hustisya karon ang singgit sa pamilya alang sa pagkamatay sa ilang kabanay.
