Nagresulta sa pagkadakop sa top 68 most wanted sa regional level ang pagpaningkamot sa kapulisan sa dakbayan.
Kini gumikan sa kamanduan ni City PNP Director Col. Gilberto Tuzon nga dili muundang sa pagpangita sa mga suspek sa kremin.
Nasikop sa kapulisan si Murad Mohammad Unggal nga gitawag usab ug Murad Mastura Unggal 42 anyos nga taga Prk. Sarif Mucsin, Brgy. Baluan, ning syudad.
Matud ni Police Lt. Clarizel perez, tigpamaba sa General Santos City Police Office kon GSCPO nga gumikan sa mga testimonya sa mga testigo og lig-on ebedensya kalabutan sa pagpamusil patay kang Baluan Kagawad Omar Mamalumpong nagpagawas ang korte og warrant of arrest sa miaging Abril 2021 nga walay pyansa nga girekomenda.
Padayon pa nga giimbestigahan sa kapulisan kung nalambigit sa gun for hire ang suspek.
Kahinumduman kaniadtong bulan sa Marso 2020 samtang sakay si Mamalumpong sa iyang motorsiklo gipusil patay sa Dr. Jorge Royeca boulevard .
Nakaangkon ang biktima og samad sa ulo nga maoy hinungdan sa iyang kamatayon.Makalabay ang pipila ka bulan gipusil patay usab ang igsuon ni Omar nga lalaki sa nakamotor nga mga suspek sa Barangay North ning syudad.
