GENERAL SANTOS CITY – Gipahinumduman si Sen. Manny Pacquiao sa igsuon nga si Lisa Onding, nga pangandaman pagmaayo ang umaabot nga away kang Lucas Matthysse sa Hulyo 15.
Sa interview sa Bombo Radyo, gibutyag ni Lisa nga dili basta-basta nga kaatbang si Matthysse nga halos daog via knockout ang resulta sa nakalabay’ng 44 ka away.
Hinungdan nga kinahanglang mas preparado ug insayado ang igsuon una musaka sa ring.
Kahibaluan nga gitawag nga conditioning coach ni Pacquiao nga si Justin Fortune ang Argentine boxer nga usa ka ‘very dangerous guy.’
Hinungdan nga gikinahanglan matud pa sa Pinoy ring icon ang smart training alang sa mas precise nga movements ug dili ma-over train.
Gibutyag usab niini nga na-overtrain kaniadto si Pacquiao sa away kang Australian boxer Jeff Horn, kung asa kahinumduman nga napildi ang fighting senator.
Apan gihingusgan niini nga si Manny ang tinuod nga midaog sa maonga away.
Samtang, alang sa iyang inahan nga si Mommy Dionisia, gitugyan na lamang matud pa niini sa Diyos ang gikatakdanga away sa fighting senator.
Sumala pa nga wala pa niya nakita bisan sa litrato si Matthysse, hinungdan nga ang Diyos na lamang ang bahala kang Manny, ug giampo niini nga dili pasagdan ang anak.
