Pildi na sa ring, pildi pa gyud sa kasing-kasing ang Czech Amateur MMA Fighter nga si Lukasz Bukovac human kini gi-busted sa iyahang hinigugma atubangan sa 20-mil ka mga tawo, dihang nag propose kini, mismo sa octagon ring.
Makita sa video nga ning kuyanap online nga gikuha sa uyab ni Bukovac ang mic samtang nagluhod ang maong lalaki, ug gibulgar nga dili kini mosugot sa iyahang marriage proposal tungod sa gihimo niining pagpanapaw.
Sumala sa babaye nga “After everything that happened between us, after the betrayals on your part, I don’t think this is a good idea. I say no,”. Wala nay nahimo si Bukovac ug wala dayon kini naka barog gikan sa iyahang pagluhod tungod sa mga pulong nga giluwatan sa iyahang kanhi uyab.
Makita usab sa lain pang video nga ning kuyanap sa social platform nga X nga giduol si Bukovac sa iyang ka-team nga dunay dalang tubig ug gisablig sa babaye.
Sa kasamtangan, viral na ang maong video online, samtang ang mga netizens usab ning dapig kang Lukasz tungod sa kaisog niini nga mopadayag sa iyahang gugma sa babaye.
Wala usab malipay ang uban sa kanhi niining uyab tungod kay kung tarong pa daw kini nga pagka babaye, dili unta niini hatagan og ikaduhang kaulawon ang maong mandudula human na pildi sa kurto.
