GENERAL SANTOS CITY – Nanganti si P/Col. Benito Recopuerto, regional chief sa Highway Patrol Group (HPG) 12 nga manubag ang iyang sakop kung nalambigit sa kahiwian.
Kini ang reaksyon ni Col. Recopuerto human nga migawas sa report nga may sakop sa HPG South Cotabato nga gikaingon nga nalambigit sa pagpalusot sa smuggled cigarettes.
Base sa imbestigasyon sa Makar Police Station nga may nadawat sila nga report kalabutan sa natigayon nga vehicular accident sa Diversion Road, Sinawal ning syudad kaganihang kaadlawon hinungdan nga girespondihan.
Nakit-an sa area ang usa ka puti nga van nga may unod nga kinahon sa sigarilyo og itum nga Fortuner nga may karga nga tulo ka box sa Baru cigarettes nga gimanehuan sa usa sakop sa HPG nga na-assign sa South Cotabato nga si PSSg. Rex Jalandoni nga taga Tupi, South Cotabato.
Ang iyang tulo ka mga pasahero mao silang Kenneth Tabion nga residente sa Tupi, South Cotabato, Meljy Antugon, nga taga Palimbang, Sultan Kudarat og si Gerant Gervacio, sakop sa Philippine Coastguard nga taga Labangal ning dakbayan.
Gibutyag nga ang itum nga Fortuner ang escort sa van.
Nasayran nga ang maong van ang miikyas sa checkpoint sa kapulisan sa Maasim, Sarangani Province.
Sa pag-ikyas hapit na nga maigo ilang PNP personnel sa checkpoint hinungdan nga gipahigayon ang hot pursuit operation.
Nakuha sa posisyon ni Jalandoni ang usa ka 9mm beretta.
Sa kasamtangan gipahigayon sa mga otoridad ang imbestigasyon sa maong panghitabo.
