Gipaniguro ni Philippine National Police (PNP) officer-in-charge PLtGen. Jose Melencio Nartatez Jr., nga tutokan niini ang kaso sa mga nangawala nga sabungero dungan saiyang paglingkod isip hepe sa kapulisan.
Matod ni Nartatez, usa kini sa mga ‘pressing tasks’ nga iyang atubangon.
Matod niya nga importante nga ma-monitor ang dagan sa kaso, ilabi na nga aduna nay gipasaka nga reklamo batok sa mga nalambigit sa pagkawala sa mga sabungero, sa inisyatiba sa Department of Justice.
Ang heneral gikataho usab nga momando sa tukma nga mga yunit sa pulisya nga makig-alayon sa DOJ, mga saksi, ug uban pa nga mahimong maghatag dugang nga kasayuran sa isyu.
Matod niya nga sa pagkakaron, adunay police unit nga nakatutok sa kaso, nag-una niini ang Criminal Investigation and Detection Group, ug hugot nilang gibantayan ang kaso.
Sa termino ni PGen. Nicholas Torre III isip Chief PNP, nakuha sa kapulisan ang testimonya sa managsuong Patidongan, kinsa gikonsidera nga adunay pangunang kahibalo sa pagkawala sa mga sabungero.
Gipangunahan usab sa PNP Forensic Group (FG) ang pagsusi sa giingong mga patayng lawas nga narekober sa Taal Lake, human sa sunodsunod nga diving operations sa maong linaw.
