Padayon ang search ug assessment operations sa lokal nga panggamhanan sa Jose Abad Santos, Davao Occidental human sa grabeng pagbaha nga gipahinabo sa walay hunong nga pag-ulan.
Gikumpirma ni Municipal Information Officer Julie Marie Buen nga nagpabilin sa pito ang gidaghanon sa mga tawo nga gipaabot nga missing tungod sa kusog nga baha. Duha sa maong mga missing ang mga senior citizen.
Matod ni Buen, nagpadayon ang koordinasyon sa mga responder ug mga barangay aron mapadali ang pagpangita sa mga missing ug mahatagan dayon og tabang ang mga apektadong pamilya.
Samtang, nanawagan ang mga residente sa mga otoridad ug sa publiko alang sa dugang nga pagkaon, tubig, ug uban pang nag-unang panginahanglan, tungod kay lisod pa sa pagkakaron ang pag-abot sa ayuda.
Daghan usab kaayong mga dalan ang dili pa maagian human madaot sa baha ug pagdahili sa yuta, nga maoy naglisod sa paghatod sa relief assistance ug sa paglihok sa mga rescue team.
Padayon ang monitoring sa lokal nga panggamhanan samtang gihangyo ang mga residente nga magpabiling alerto ug sundon ang mga pahimangno sa mga otoridad aron malikayan ang dugang nga peligro.
