GENERAL SANTOS CITY – Ugmang adlawa gilaumang kasuhan ug adultery ang usa ka misis human gireklamo sa bana tungod sa pagpangluib.
Kasamtangang balhug sa Malungon Municipal Police Station ang nasampit nga misis nga si Alyas Neneng, 28 anyos, residente sa Lower Mainit, Malungon, Sarangani.
Matud ni Po2 Froiland Amis, midangop sa ilang presinto ang bana ni Alyas Neneng nangayong tabang ug mihangyo ug police assistance, aron ipadakop ang nasampit tungod usa ka semana na matud pang nakigpuyo sa lalaki niini nga si Alyas Dodong, anaa sa 30 anyos ang pangidaron.
Giadtuan nila ang panimalay sa igsuon ni Alyas Neneng ug didto naabtan nga nagdulog ang duruha sa usa ka lawak.
Nasayran nga kanhing nagtrabaho sa usa ka canning factory dinhi sa dakbayan si Alyas Neneng, kung asa sila nagkaila ni Alyas Dodong. Ug dihang miuli sa ilaha, nag-uban na ang duruha.
Samtang gikabutyag nga posibleng istoryahan na lamang kini sa kampo sa magtiayon ilawom sa ilang tribo, ug dili na lamang magpasang-at ug kaso, hinungdan nga nag-agad na lamang ang kapulisan alang sa mamahimong lakang nga himuon.
